Кырдьаҕастан – алгыһын, эдэртэн эйэтин ыл диэн саха мындыр этиитинэн салайтаран, ааспыт күн Хатас нэһилиэгин аҕам саастаахтарын уонна ыччат дьонун ахтыыптара мустан, нэһилиэк кэскилин туһунан стратегическэй сессия тэрийэн торумнастылар. Дьүүллэһиигэ «Биир ньыгыл Россия» партияттан биир мандааттаах Заложнай быыбардыыр уокуруктан Ил Тумэн депутатыгар кандидат, СӨ Үүнэр көлүөнэтин тус сыаллаах фондатын генеральнай директора Владимир Егоров, «Биир ньыгыл Россия» партия испииьэгинэн эмиэ бу уокуруктан Ил Тумэн быыбарыгар кыттар Арктикатаа5ы ГАТУ салайааччыта Валерий Федоров уонна «Көмүлүөк» хампаанньа олохтооччута, директора Ольга Григорьева кыттыыны ыллылар.
Хатас отут сыллаааҕыттан саҕалаан сайдан кэлбит суолун ырытыыны уонна бүгүҥҥү туруорсуулары оонньуу быһыылаахтык Хатастааҕы «Ситим» норуот айымньытын дьиэтин директорын солбуйааччы, Дьокуускай куорат думатыгар «Биир ньыгыл Россия» партияттан биир мандааттаах уокуруктан кыттар Алексей Осипов тэрийэн ыытта.
Мустубут дьон хамаандаларга хайдыһан 30 сыл иһигэр Хатас нэһилиэгэр туох уларыйыы буолбутун ааттаатылар итиэннэ «Хатас сайдыытыгар туох этиилээхпитий?», «Туох саҥаны киллэриэхпит этэй?», «Ханнык быһаарыылартан аккаастаныам этэй?» диэн ыйытыыларга хоруйу көрдөөтүлэр.
30 сыл иһигэр нэһилиэккэ олус элбэх уларыйыы буолбута оннооҕор олохтоохтору соһутта. «Күннэтэ көрөр буолан, киһи аахайбат буолар эбит» диэн оонньуу кыттыылаахтара билиннилэр. Салгыы Хатас сайдыытыгар этиилэри киллэрии түһүмэҕэ эмиэ олус интэриэһинэйдик барда. Стратегическэй сессия кыттыылаахтара канализационнай-ыраастыыр тэрили, Баҕарахха саҥа оскуола, Хатаска саҥа баанньык, баһаарынай чаас тутуутун, табыгастаах автобус тохтобулларын туруорууну ыйдылар. Итини сэргэ, аҕам саастаах дьоҥҥо аналлаах тэриллиилээх түмсүүлэри, элбэх оҕолоох ыаллар олорор кварталларыгар туспа оҕо саадын, Хатас олохтоох ыччатын нэһилиэккэ хаалларар сыаллаах наставничество институтун сайыннарыыны, о.д.а. этэллэр.
Стратегическэй сессияҕа киирбит этиилэри ырытыһыы түһүмэҕэр Владимир Егоров Хатас нэһилиэгэр уу, канализация боппуруостара сытыытык тураллара олох сайдыытын көстүүтэ диэн бэлиэтээтэ. «Хатас нэһилиэгэ куорат уокуруга статустаах буолан, олохтоохтор тыа сиригэр көрүллэр Уһук илин уокуруктааҕы ипотеканы туһанар кыахтара суох. Нэһилиэккэ ыччат дьон талаһыыта олус үрдүк, онон бу боппуруоһу туруорсар оруннаах буолуо этэ. Нэһилиэк олохтоохторо төрүт сирдэрин сайыннарыы туһунан этиилэрэ эмиэ болҕомтоҕо ылыллара наада. Бу манна түөлбэлэринэн граннарга кыттыы механизмнарын көрөр наада. Олохтоохтор төрөөбүт Хатаскыт туһугар кыһамньыгыт олус хайҕаллаах, бииргэ үлэлэһэргэ бэлэммит», - диэн эттэ.
Арктикатаа5ы ГАТУ ректорын эбээһинэһин толорооччу Валерий Федоров Хатас тыа нэьилиэгин быьыытынан биллэр, онон бу дьарыгы ыһыктыбат наада диэн бэлиэтээн эттэ. “Ааспыт үйэ 70-с сылларыгар тутуллубут сүөһү иитэр комплекстар тутууларын саҥардар наада. Хотоннор эргэрдилэр, сүөһү да турарыгар, дьон да үлэлииригэр усулуобуйа мөлтөх. Хатас нэһилиэгин аҕам саастаах дьоно элбэх квартиралаах таас дьиэлэри тутууну туруорсаҕыт, бу боппуруоһу кытта уу, канализация систематын тутуу дьүөрэлэһэр. Итиэннэ биир сытыы боппуруос – бөҕү тиэйии-таһаарыы кыһалҕата. Кырдьык, сытыы, тирээн турар боппуруостар, эһиги этиилэргитин олоххо киллэрэргэ республика уонна муниципальнай былаас уорганнара бииргэ үлэлэһэллэрэ наада”, - диэн быһаарда.
«Көмүлүөк” хампаанньа салайааччыта Ольга Григорьева дьүүллэһии кыттыылаахтара дьиэ кэргэн сыаннастарын, оҕо саадын тутууну туруорсалларын сэҥээрэрин биллэрдэ. “Хатас – сахалыы тыыннаах нэһилиэк. Манна дьиэ кэргэн сыаннастарын, оҕону сахалыы тыыҥҥа иитиини тарҕатарга сөптөөх усулуобуйаны тэрийэн, бастыҥ уопуту республикаҕа да тарҕатар кыах баар. Түөлбэлэр түмсүүлэрин бөҕөргөтүөххэ, сахалыы балаҕан тутан, онно нэһилиэк аҕам саастаахтара мустан, эдэр дьоҥҥо сүбэ-соргу тарҕаттыннар, таарыйа бэйэлэрэ айар талааннарын сайыннардыннар. Бу олоххо киирэр кыахтаах бырайыактар, барыта бэйэбититтэн тутулуктаах. Сайдыы, кэлэр кэскил диэки хайысхалаахтык олорорбут хайҕаллаах, оччоҕо эрэ инникигэ хардыылар баар буолуохтара”, - диэн Ольга Григорьева тэрээһин кыттыылаахтарыгар туһаайан эттэ.
